A finais de xullo rematouse a fase de gravación de campo do proxecto Temos Raices, comeza agora a de edición que rematará coa estrea dun documental resume da Historia do ecoloxismo galego dende 1973 até hoxe. Será o 19 de Outubro, nunhas xornadas que a FEG está organizando (axendanda a data).

O documental, inserido no proxecto Temos Raíces, é un proceso de longo percorrido que se leva xestando varios anos en artigos e encontros que, desde as persoas que formamos parte deste movimento social ao longo do tempo, demandan a posta en valor do traballo realizado, das persoas e organizacións que participamos, dos logros conseguidos e dos principais problemas e ameazas ambientais que están presentes na nosa terra.

O documental, e a xornada de outubro na que se presentará, conta cunha axuda para a súa realización da Deputación da Coruña (axuda DP0031/2024). O traballo audiovisual está dirixido por Xacobe Melendrez Fassbender, artista audiovisual de longa traxectoria que tamén forma parte do movimento ecoloxista.

Do documental forman parte 18 entrevistas grupais a máis de 50 persoas que formaron parte no pasado ou forman parte no presente do movimento ecoloxista. O audiovisual non presentará todo este material, xa que o traballo e o tempo de produción é inmenso e non todas as pezas poderán formar parte do documental que se presentará en outubro. Porén, todo este traballo pasará a formar parte dun arquivo documental da FEG que será o cerne da recuperación da memoria do movimento a través dos seus e das súas protagonistas e que contará con materiais audiovisuais, documentos, cartelería e outro material producido polo movimento ecoloxista galego.

A continuación mostramos imaxes de algunhas das pezas gravadas cos seus protagosnistas para ir amosando o que serán as pezas que formarán parte do arquivo da memoria do movimento ecoloxista galego.