Admitido a trámite o recurso presentado pola APDR contra o Plan Sectorial do Porto de Marín

perigo_recheosA Autoridade Portuaria do Porto de Marín está a realizar outro novo intento de evadir o cumprimento da sentenza ditada polo Tribunal Supremo no ano 2009 que obriga a retirar os recheos que permitiron gañar ao mar máis de 300.000 metros cadrados, modificando os parámetros hidrodinámicos da zona interna da Ría de Pontevedra coa conseguinte modificación dos corpos sedimentarios o que provocou graves danos aos ecosistemas e aos recursos naturais. Un argumento principal daquela sentenza é o da falta dun estudo de impacto ambiental sobre o conxunto dos recheos que se pretendían realizar.

Coa intención de evitar o cumprimento da sentenza, a Autoridade Portuaria ten elaborado un novo Plan Especial, aprobado en xullo deste ano, a través do que pretende dar cobertura legal aos recheos realizados e en execución, un novo plan que reincide nas mesmas deficiencias que posuía o orixinal aprobado no ano 2000 e a súa modificación que se aprobou en 2005, ambos anulados, e por suposto na fundamental destas deficiencias, a falta dun estudo de previsión do impacto ambiental nos ecosistemas e sistemas produtivos da Ría de Pontevedra. A non realización deste estudo constitúe en realidade parte dunha estratexia para levar a cabo os recheos con plena consciencia, dende o inicio dos mesmos, de que este dano se produciría e de que unha avaliación previa o revelaría. Este impacto viuse confirmado na tramitación da modificación do plan aprobado en 2005, cos recheos xa iniciados, por distintos informes técnicos; así un informe de setembro de 2003 da Delegación Provincial de Pontevedra da entón Consellería de Pesca e Asuntos Marítimos concluía: “A modificación das correntes, como consecuencia de obras realizadas ao redor de toda a costa, están provocando o enfangamento de moitas zonas marisqueiras, coa conseguinte destrución dalgúns bancos marisqueiros e a redución da produción en outros, que afectarán nun futuro próximo á renda dos mariscadores e como consecuencia á economía da zona e a problemas sociais” . Tamén  a Dirección Xeral de Recursos Marítimos da mesma consellería aseguraba no seu informe de outubro de 2003 que “A zona de Placeres é un banco de grande importancia marisqueira. A realización dos distintos recheos está ocasionando modificacións das correntes existentes na zona con perda de zonas explotables por enfangamento e prexuízo económico para o sector pesqueiro-marisqueiro” ; a pesar distas evidencias a Autoridade Portuaria seguiu adiante cos recheos, incumprindo a lexislación e provocando un impacto que foi aumentando co tempo. Os resultados son loxicamente os previstos polos técnicos: destrución ambiental, perda de zonas explotables para o marisqueo e prexuízo económico e social para o sector.

Sentenzas do Tribunal Superior de Xustiza de Galicia anulando a Modificación do Plan Especial e a recente da Audiencia Nacional anulando o Plan de Usos e Servizos Portuarios confirman a ilegalidade das actuacións pasadas e presentes realizadas pola Autoridade Portuaria e permiten asegurar que a única vía legal de cara ao futuro pasa pola retirada dos recheos e a planificación da actividade portuaria desde a perspectiva de sostibilidade ambiental e social, favorecendo os beneficios sociais asociados á actividade portuaria e sen destruír ecosistemas e fontes de recursos que proporcionan moitos postos de traballo de grande interese económico e social.

A situación ven sendo posta en evidencia pola Asociación Pola Defensa da Ría desde o comezo da redacción do primeiro Plan Especial no 1994, facendo fincapé na ilegalidade das obras que se planificaban e que se seguen a realizar, denunciando administrativa e xudicialmente a esperpéntica tramitación e as consecuencias das actuacións.

Cando se produciu a aprobación do novo Plan Especial, no mes de xullo, a APDR presentou diante da sala do contencioso administrativo do Tribunal Superior de Xustiza de Galicia un recurso a través do cal se solicita a anulación do mesmo. Os argumentos son os mesmos que fixeron que se anularan os anteriores xa que nada cambia no substancial con respecto a eles e dado que segue sen realizarse unha análise das modificacións que o conxunto dos recheos están a provocar. Estes días, o TSXG, ven de comunicar á APDR que o recurso presentado foi admitido a trámite, abríndose unha fase de análise e argumentación xurídica que debería terminar coa anulación deste novo plan e a imposición ás administracións responsables (Xunta de Galicia, Deputación de Pontevedra e Autoridade Portuaria) da obriga do cumprimento da sentenza do Tribunal Supremo e, xa que logo, da retirada dos recheos ilegais realizados.

apdr

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s